Патлумачце, калі ласка, пунктуацыю ў гэтым сказе:     

«Так што вясёлка — добры знак».

Ці патрэбна коска пасля «так што»? Як мне здаецца, патрэбна. Бо тут «так што» — уводная частка сказа, яе неабходна аддзяліць. Буду ўдзячна за ваш каментар!

Коска ў названай вамі пазіцыі не патрэбна.

У прыведзеным вамі сказе так што — злучнік. Пасля гэтага злучніка коска не ставіцца. Яна можа ставіцца перад гэтым злучнікам у складаназалежных сказах з даданай выніковай часткай:

► Мы прыедзем даволі рана, так што яшчэ застанецца час на тое, каб пазнаёміцца з горадам.

Каб праверыць, ці патрэбна коска перад так што, можна паспрабаваць замяніць яго на таму. Калі такая замена магчымая, перад так што ставіцца коска:

► Мы прыедзем даволі рана, таму (так што) яшчэ застанецца час на тое, каб пазнаёміцца з горадам.

Ужыванне злучніка так што не трэба блытаць з ужываннем прыслоўя так і злучніка што. У такіх выпадках коска ставіцца перад што:

► Ён ляпнуў дзвярыма так, што чуваць было ва ўсім будынку.

Калі ж злучнік так што стаіць на пачатку сказа і з’яўляецца сінонімам таму (як у вашым выпадку), коска пасля яго не ставіцца.